Heidelberg rís hjá bakka Neckar árinnar, og við hinn goðsagnakennda Odenwald skóg, sem vex fram með hlíðum og nær allt til Rínardals. Þar má finna fleiri forna bæi og byggingar. Í Heidelberg búa í kringum 150.000 manns. Þar á meðal eru um 30.000 háskólastúdentar sem stunda nám í háskóla bæjarins, Ruprecht-Karls-Universität, sem er sá elsti í Þýskalandi, frá árinu 1386. Bærinn slapp að langmestu leyti við sprengjuárásir í heimsstyrjöldinni síðari, og þar má því finna mjög heillegar upprunarlegar barokkbyggingar, og gamlar þröngar og steinilagðar götur. Frægur er hinn svokallaði Schloss kastali, sem þykir einn

merkilegasta bygging frá endurreisnartímanum, í Evrópu allri.

Þessi einstaki staður hefur í gegnum tíðina laðað að sér fjölmarga þekkta rithöfunda, listafólk og fræðimenn héðan og þaðan úr Evrópu, sem þar hafa leitað sér innblásturs, eða nýtt sér aðstöðu og bókakost hins aldna háskóla. 

En þótt Heidelberg sé oft gefinn sá alvarlegi titill: Höfuðfræðasetur Evrópu, er staðurinn langt frá því að vera alvarlegur eða líflaus. Þar er fjöldinn allur af skemmtilegum krám og veitingastöðum og auðvelt að sletta úr klaufunum í góðra vina hópi, hvort sem hann er gáfulegur, eða bara alls ekki.