Cappadocia er staðsett í miðhluta Tyrklands og er þekkt fyrir afar óvenjulegt landslag, sem myndaðist á mörg þúsund ára tímabili með samspili eldgosa, öskufalls og veðrunar sandsteina á svæðinu. Eftir stendur þetta jarðfræði-lega undraland með stórbrotnum berg-myndunum og steinkeilum sem eru eins og af öðrum heimi, og hafa í áranna rás hlotið hið viðeigandi heiti ,,álfastrompar“. En þótt landslagið sé hér algerlega sér á báti, er upptalningu á stórmerkum undrum hvergi nærri lokið. Inni í klettum og fjöllum Cappadocia er nefnilega að finna heilu neðanjarðarborgirnar, heimili og vistarverur, forn klaustur ásamt heilögum helgistöðum þar sem líta má aldagamlar freskur sem sýna trúarsenur frá árdögum  kristninnar. Stærsti hluti þessa    svæðis   var   greyptur   í  bergið í 

kringum 1200 fKr. - 1200 eKr. og var á þessu tímabili felustaður íbúa fyrir hinum ýmsu ógnum. Í dag þjóna hellarnir eingöngu ferðamannaiðnaði, og til dæmis hægt að panta sér herbergi á hellahóteli. Slík má til dæmis finna í stærsta bæ héraðsins, Ürgüp, sem oft er nefndur hjarta svæðisins en fleiri bæi má þó nefna í grenndinni, eins og Nevşehir, sem er fullur af fegurð og sögu, Göreme, þar sem talsvert er af íbúðum inni í álfastrompum, og Uçhisar, sem geymir hæsta tind Cappadocia. Hvar sem þú dvelur mætir þér mikil gestrisni og vinátta, og upplagt að kynna sér ýmis konar venjur og siði, að ónefndum þjóðlegum réttum sem þykja bragðlauka kitlandi gómsæti. Við hikum ekki við að segja það: Héðan fer enginn ósnortinn!