Þessi fallega eyja á sér heilmikla sögu, en þar hafa bæði Frakkar, Bretar og Ítalir ráðið ríkjum. Fornar byggingar og minjar standa þar enn, vel varðveittar. Má þar nefna gamla bæinn í Corfu Town sem er á heimsminjaskrá UNESCO, gamla virkið (Palaio Frourio), og nýja virkið (Neo Frourio). Hér er líka margra áratuga hefð fyrir ferðaþjónustu, enda eyjan full af hvers kyns ánægjulegri afþreyingu fyrir alla, og heimamenn þekktir fyrir gestrisni og góða þjónustu.  Hér eru fallegar strendur, bæði gylltar sandstrendur og vel hannaðar grjótstrendur í dásamlegu umhverfi, þar sem þú getur valið hvaða skemmtun sem þú óskar þér, hvort sem þú vilt gott tjill eða þeytast um fagurgrænan hafflötinn á risavindsæng, jet-ski   eða   öðru   tryllitæki,   eða  skoða litskrúðugt lífríkið neðansjávar. Næsti bar 

eða veitingastaður eru auðvitað í seilingsfjarlægð. Hér er boðið upp á ljúfenga Miðjarðarhafsrétti, sem blandaðir eru hinum ýmsu menningar- straumum. Þá er næturlífið taktfast og fjörugt og fullt af iðandi skemmtun. Það er ekki að ástæðulausu að Corfu þykir frábær áningastaður fyrir hvers kyns hópaferðir, hvatningaferðir, skólaferðir og ráðstefnur. Sumir láta sér ekki nægja að koma bara einu sinni, ýmsir Ferrari- og fornbílaklúbbar hittast til að mynda þar með reglulegu millibili. Alls kyns skemmtiferðir eru í boði, heimsóknir í ólífugarða, á vínekrur, í bjórframleiðslur, jeppasafarí eða aðrar náttúru-skoðunarferðir. Svo geturðu líka bara farið þínar eigin leiðir og notið þeirrar fegurðar og lífsins gæða sem þessi yndiseyja býður upp á.