Garda vatn (Lago di Garda) á Norður-Ítalíu hefur lengi laðað til sín gesti sem vilja njóta þeirrar fegurðar sem þar má finna. Strax á tímum Rómverja fóru að rísa miklar villur við vatnið, sem ætluð voru höfðingjafólki í afslöppunarhug, en ferðaiðnað í nútímaskilningi má þó rekja til loka 19. aldar. Í kringum vatnið eru hátt í 20 sjarmerandi bæir, hver með sína sérstöðu, og mikil ánægja að ferðast á milli þeirra, hvort sem er á bát eða bíl. Bærinn Garda er einna vinsælastur og auðvelt að gleyma sér þar, skoða fornar byggingar og sögu, eða bara njóta hinnar yndislegu stemmingar sem þar ríkir. Önnur þorp á svæðinu eru þó engu síðri, nefna má Sirmione, Malcesine, Limone, Borghetto og Salò sem dæmi um áhugaverða staði. Ýmislegt má finna sér

til afþreyingar við Garda vatn. Við norðurhluta vatnsins er ýmis konar vatnasport vinsælt, siglingar, brimbretti, fallhlífaflug og fleira. Suðurhelmingurinn þykir skjólsælli og þar er mikið af góðum göngu- og hjólaleiðum í hlíðunum í kring og meðfram vatninu. Reyndar má finna góðar hjólaleiðir alls staðar við vatnið. Eins og áður sagði vissu Rómverjar af gæðum svæðisins og hægt er að skoða ýmsar fornar rústir og byggingar allt frá þeim tíma. Þar standa líklega efst rústir rómversku villunnar Grotte di Catullo sem er flottur minnisvarði um fornítalska tíma. Í mat og drykk verður enginn fyrir vonbrigðum. Hver bær hefur sína sérrétti og vín, en allir eiga þó sameiginlegt að nota ferskt og gómsætt hráefni úr heimabyggð í sína gúrmei málsverði.