Liverpool er ein af þessum borgum sem ekki hefur verið mikið áberandi á radar íslenskra utanlandsfara, og það er merkilegt, því hún hefur síðustu ár verið mjög ofarlega á ýmsum listum yfir bestu áfangastaði heims. Hún þykir vinaleg og þægileg, þar má finna fallegar gamlar byggingar, áhugaverð söfn og menningarlíf, og næturlífið er eins og stundum er sagt, alveg epískt! Borgin er staðsett í norðvestur Englandi, og á rætur að rekja til bæjarins Liuerpul sem fékk bæjarrétt sinn staðfestan árið 1190. Annað hvert mannsbarn veit að Bítlarnir eru frá Liverpool, og auðvitað er heljar safn tileinkað þeim, The Beatles Story Museum. Þangað liggur leið margra, enda er safnið mjög skemmtilegt. Þá er The Cavern Club líka vinsæll en þar hlutu strákarnir  eldskírn  og  voru  uppgötvaðir.

Liverpool hefur um margra alda skeið verið athafnasöm hafnarborg, og hverfið við höfnina hefur verið skráð á Heimsminjaskrá UNESCO. Göngusvæðið við sjávarsíðuna býður upp á æðislegt útsýni og innsýn í hina fornu sögu. Þar eru líka byggingar eins og The Liver Building og Royal Albert Dock sem er stærsta friðaða húsasamstæða í Englandi. Hafnarhverfið er ávallt fullt af lífi, þar er fjöldi safna, listgallería, verslana og veitingastaða. Þau sem elska samtímalist ættu t.d. að kíkja á Tate Liverpool safnið og þau verslunarþyrstu ættu hiklaust að fara í Liverpool ONE í miðbænum. Þegar dagur er að kveldi komin sameinast svo allir úti á galeiðunni, í þeirri næturlífsparadís sem Liverpool breytist í á hverri nóttu.