Toronto er fjölmennasta borg Kanada og héraðshöfuðborg Ontario, staðsett á norðvesturströnd Ontario-vatns. Íbúatala er rúmlega 6 milljónir. Toronto er ljúfur fjölmenningarkokteill, þar sem lögð er áhersla á fjölbreytilegt mannlíf og ólíkir menningarstraumar fá að njóta sín. Yfir öllu svífur svo hið þekkta hlýlega og vinalega kanadíska andrúmsloft. Hér líður fólki vel hvaðan sem það kemur. Loonies and toonies! eins og þau segja þarna í Kanada, þegar allt er frábært. Lista- og skemmtanalíf borgarinnar er margrómað, hér er ein af stærstu kvikmyndahátíðum heims haldin árlega, fjöldinn allur af leikhúsum og tónleikastöðum stórum og smáum, og eins og borg af þessari stærðargráðu sæmir er næturlífið ansi fjölskrúðugt og fullt af stuði. Í Toronto má

þó líka finna rólegheit, og fallega áningastaði sem bjóða þér að njótu náttúru og kyrrðar. Til dæmis má mæla með göngu í High Park garðinum, sem er víðfeðm borgarvin með blómstrandi kirsuberjatrjám og annarri gróðursæld. Þá tekur aðeins um 15 mín að sigla með ferju úr miðbænum til Toronto Island þar sem þú getur farið á ströndina, tekið góðan hjólreiðatúr, eða gengið um og notið víðáttumikils útsýnis yfir borgina. Fyrir söguþyrsta má benda á Fort York National Historic Site sem er mögnuð heimild um bardagann í York (1812) þegar heimamenn vörðust árásar Bandaríkjamanna,  og Royal Ontario Museum sem lýsir vel sögu borgarinnar, allt frá frumbyggjum hennar, landnámi hvíta mannsins og þróun í áranna rás.