Tallinn er höfuðborg Eistlands og staðsett við suðurströnd Finnlandsflóa, aðeins 70 km suður af Helsinki. Miðaldakjarni hennar stendur á Toompea hæðinni, og er einn best varðveitti miðaldabær í allri Evrópu, með byggingar og minjar allt frá 11. öld. Það er töfrum líkast að ganga um þetta hverfi, um steinhellulagðar götur, meðfram mögnuðum mannvirkjum, og útsýnið af hæðinni er dásamlegra. Í borginni má einnig finna fádæma safn stórkostlegra kirkjubygginga. Þar er Alexander Nevsky dómkirkjan líklega efst á blaði, skrautleg bygging sem þjónar rétttrúnaðarkirkjunni og er eitt af þekktustu kennileitum Tallinn. Einnig ber að nefna St. Mary's dómkirkjuna, sem er einkar glæsileg.

Það er líf og fjör í Tallinn, og þótt borgin standi á grunni glæstrar fortíðar þá tifar nútíminn hér í dillandi takti. Ráðhústorgið iðar af sjarma og lífsgleði og er góður staður til að setjast og taka inn stemminguna. Matarsenan er á afburða háum standard, hér er fjölbreytt úrval veitingastaða sem bjóða upp á hágæða rétti, þjóðlega og alþjóðlega. Ef einhver vill kynna sér þjóðlegar hefðir má benda á svarta brauðið, reyktan fisk, og svo eru Eistar snillingar í plokkfiskgerð. Hér eru barir og skemmtistaðir, sem bjóða upp á alla þá drykki sem hugurinn girnist, hér geturðu dansað inn í nóttina, eða sest á huggulegan stað og átt dásamlega stund í góðra vina hópi. Eitt er sannarlega víst: þér mun líða afskaplega vel í Tallinn!